„იმ დღეების გახსენება არ მინდა. ეს არ არის უბრალოდ დანაკარგი… ეს არის სიცარიელე, რომელსაც არასდროს არაფერი შეგივსებს,“,- მსახიობისა და ინფლუენსერის, თამუნა მდივანის შვილი, მარიამ მდივანი გადაცემა „პრაიმ შოუში ძმის შესახებ საუბრობს.
მისი თქმით, ძმის დაკარგვა იმდენად მძიმე განცდაა, რომ ამის სრულად აღქმა მხოლოდ იმ ადამიანს შეუძლია, ვინც მსგავსი ტკივილი საკუთარ თავზე გამოსცადა.
„იმდენად მძიმეა, რომ სანამ ამას ადამიანი გვერდიდან უყურებს, ვერ აღიქვამს. ისეთი განცდაა, თითქოს საკუთარი სხეულიდან ნაწილი გწყდება,“ — ამბობს მარიამ მდივანი.
როგორც ის იხსენებს, მისი ძმა, გიორგი, მაშინ დაიბადა, როცა თავად 4 წლის იყო და მასთან განსაკუთრებული ურთიერთობა აკავშირებდა.
„ყოველი მისი დღე მახსოვს. ძალიან კარგი დაძმობა გვქონდა. ერთმანეთი ძალიან გვიყვარდა. მისი პირველი მესაიდუმლე ვიყავი,“ — აღნიშნავს ის.
მარიამ მდივანის თქმით, გიორგი საოცრად მზრუნველი ადამიანი იყო, რომელსაც ოჯახის წევრებისა და გარშემომყოფების ტკივილი გულთან ახლოს მიჰქონდა.
„შეყვარებული არ ჰყავდა. საოცრად კარგი შვილი იყო. ძალიან მზრუნველი. ყველა აინტერესებდა და ანაღვლებდა,“- ამბობს იგი.
მისივე თქმით, ძმის გარდაცვალების შემდეგ საკუთარი ემოციების სრულად განცდის შესაძლებლობაც არ ჰქონია, რადგან ოჯახის, განსაკუთრებით დედის გვერდით დგომა საკუთარ პასუხისმგებლობად მიიჩნია.
„ჩემს ტკივილს ვერ განვიცდიდი, რადგან ვგრძნობდი, რომ დედაჩემს ვჭირდებოდი. მივხვდი, რომ მთელი პასუხისმგებლობა მე უნდა ამეღო. დედას აქვს ძალიან დიდი რწმენა. ეკლესიაში დადის და ეს ყველაფერი ძალიან ეხმარება. ჩვენ გვწამს, რომ გიორგი მარადიულ სასუფეველშია. გვინდა, როდესაც გარდავიცვლებით, მასთან მოვხვდეთ, რაც ძალიან რთულია,“- აცხადებს მარიამ მდივანი.
