დღეს, როცა მთელი მართლმადიდებლური სამყარო გლოვობს საქართველოს კათოლიკოს-პატრიარქს, უწმინდეს და უნეტარეს ილია მეორეს, რასაკვირველია, ყველაზე მეტად ამ უდიდეს დანაკარგს მისი უახლოესი ადამიანები განიცდიან – ოჯახის წევრები და მეგობრები. პირველ რიგში კი მისი ძმისშვილი და ამავდროულად მისი ერთგული მეგობარი წლების განმავლობაში, ბათუმისა და ლაზეთის მიტროპოლიტი, ჩრდილოეთ ამერიკისა და კანადის მიტროპოლიტი, საქართველოს საპატრიარქოს საინფორმაციო სამსახურის თავმჯდომარე მეუფე დიმიტრი შიოლაშვილი (სწორედ მისი დისშვილი აღიკვეცა პატრიარქის გარდაცვალებამდე ორი დღით ადრე ბერად და დაერქვა ილია – იხილეთ ვრცლად).
როგორც ცნობილია, ილია მეორეს (ირაკლი ღუდუშაურ-შიოლაშვილს), რომელიც 1933 წლის 4 იანვარს ვლადიკავკაზში, გიორგი სიმონის ძე ღუდუშაური-შიოლაშვილისა და ნატალია იოსების ასულ კობაიძის კეთილმორწმუნე ოჯახში დაიბადა, ჰყავდა დედმამიშვილები: ძმები – თეიმურაზი, შოთა, ვიქტორი, და – ნინო (ნატალია).
უფროსი ძმა ვიქტორი, რომელიც ბერი გიორგის სახელით მოღვაწეობდა, რამდენიმე ხნის წინ გარდაიცვალა. მეუფე დიმიტრი კი ილიას ძმის შოთას შვილი გახლავთ.
ერისკაცობაში ნოდარ (ჭაბუკა) შოთას ძე შიოლაშვილი დაიბადა 1961 წლის 16 თებერვალს მცხეთაში. ყმაწვილობიდან იზრდებოდა ბიძის, იმხანად მეუფე ილიას, სრულიად საქართველოს კათოლიკოს-პატრიარქის, უწმიდესი და უნეტარესი ილია II-ის მეთვალყურეობით. 1979 წელს დაამთავრა მცხეთის საშუალო სკოლა და ჩაირიცხა მცხეთის სასულიერო სემინარიაში, რომლის დამთავრების შემდეგ სწავლა განაგრძო მოსკოვის ზაგორსკის სასულიერო აკადემიაში. 1986 წელს დაიცვა დისერტაცია საეკლესიო ისტორიაში და დაბრუნდა საქართველოში. მისმა უწმიდესობამ, სრულიად საქართველოს კათოლიკოს-პატრიარქმა ილია II-მ 1985 წლის 28 ივლისს დიაკვნად, 1986 წლის 12 იანვარს მღვდლად აკურთხა და განაწესა ბათუმის წმ. ნიკოლოზის ტაძარში მღვდელმსახურად. 1987-1988 წლებში მსახურობდა ალავერდის ტაძარში, 1988-1989 წლებში – თბილისის ანჩისხატის საკათოლიკოსო ტაძარში, იმავდროულად ლექციებს კითხულობდა თბილისის სასულიერო აკადემიაში.
1989 წლის 13 მაისს მისი დეკანოზად ხელდასხმა მოხდა ბათუმის ყოვლადწმიდა ღვთისმშობლის ტაძარში. 1991 წლის 14 ოქტომბერს დაინიშნა ბათუმის ანდრია პირველწოდებულის სახელობის გიმნაზიის რექტორად. 1993 წლის 14 სექტემბერს დაინიშნა წმიდა იოანე ღვთისმეტყველის სახელობის ბათუმის სასულიერო სემინარიის რექტორად. 1996 წლის 25 ოქტომბერს აღიკვეცა ბერად და მეორე დღეს, 26 ოქტომბერს ამაღლებულ იქნა არქიმანდრიტის ხარისხში. იმავე წლის 8 ნოემბერს სრულიად საქართველოს კათოლიკოს პატრიარქმა ილია II-მ მცხეთის საკათედრო ტაძარში აკურთხა ბათუმისა და სხალთის ეპისკოპოსად. 2003 წელს მეუფე დიმიტრის მიენიჭა მთავარეპისკოპოსის ხარისხი. 2006 წლის დეკემბერში ბათუმ-სხალთის ეპარქია გაიყო ბათუმ-ქობულეთისა და სხალთის ეპარქიებად. ბათუმ-ქობულეთის მღვდელმთავრად დადგინდა მთავარეპისკოპოსი დიმიტრი. 2007 წლის დეკემბერში ბათუმ-ქობულეთის ეპარქია გადაკეთდა ბათუმისა და ლაზეთის ეპარქიად, რომლის წინამძღოლად მიტროპოლიტი დიმიტრი აირჩია წმინდა სინოდმა და იმავე წლის 3 ივნისს მიტროპოლიტის წოდება მიენიჭა.
‘
Leave a Reply