1-ლი მაისიდან უცხოელ გიდებს ჯგუფური ტურების ჩატარება აეკრძალათ.
ახალი ნორმების მიხედვით, შრომითი საქმიანობის დაწყებამდე აუცილებელია შესაბამისი უფლების მიღება, რომელსაც დასაქმების ხელშეწყობის სააგენტო გასცემს, თუმცა განსაზღვრულია ლიმიტები.
უცხოელის დასაქმებისთვის
2 000 ლარით ჯარიმდება როგორც დამსაქმებელი, ისე უცხოელი.
განმეორებითი დარღვევის შემთხვევაში ჯარიმა იზრდება 4 000 ლარამდე
განმეორებით დაჯარიმების შემდეგ კვლავ დარღვევისას ჯარიმა შეიძლება გაიზარდოს 12 000 ლარამდე.
მიღებული საკვების მონელების შეფერხების შეგრძნება, გულისრევა ან ნაადრევი დანაყრება – ეს ნიშნები შეიძლება მიუთითებდეს კუჭის კიბოზე.
თუ შეამჩნევთ ამ სიმპტომებს, დაუყოვნებლივ უნდა მიმართოთ ექიმს. ამასთან, შესაბამისი სიმპტომები, შესაძლოა ასოცირებული იყოს არა კიბოსთან, არამედ კუჭ-ნაწლავის სხვა პათოლოგიასთან, მაგრამ ჯერ ყველაზე საშიში ვარიანტები უნდა გამოირიცხოს.
კუჭის კიბოს დიაგნოსტიკისთვის ექიმები მიმართავენ ფიბროგასტროდუოდენოსკოპიის მეთოდს (FGDS). ეს პროცედურა ტარდება 45 წლიდან, ხოლო 60 წელს გადაცილებულებს ყოველწლიურად ესაჭიროებათ მისი ჩატარება.
კუჭის კიბოს რისკფაქტორებია: Helicobacter pylori ბაქტერიით ინფექცია, ჭარბი წონა და უმოძრაო ცხოვრების წესი, ცოცხალი ბოსტნეულის და ხილის არასაკმარისად მოხმარება და ნიტრატებით გაჯერებული საკვების მიღება.
ავარიას ყვარელში ახალგაზრდა ბიჭის სიცოცხლე ემსხვერპლა.
თვითმხილველების თქმით, მძღოლმა საჭე ვერ დაიმორჩილა და ბუნებრივი აირის მილს დაეჯახა. შეჯახება იმდენად ძლიერი აღმოჩნდა რომ აალება გამოიწვია. შედეგად, ადგილზე გარდაიცვალა 17 წლის ახალგაზრდა.
მანქანაში კიდევ რამდენიმე ახალგაზრდა იმყოფებოდა, რომლებიც სხვადასხვა დაზიანებებით კლინიკაში არიან გადაყვანილები.
მომხდარზე დაწყებულია გამოძიება.
დედაქალაქის მერის, კახა კალაძის ინფორმაციით, თბილისის მერია, ფილტვის კიბოს სკრინინგის დაფინანსებას იწყებს. პროცედურა, 1-ელი მაისიდან მოქალაქეებისთვის სრულად უფასო იქნება.
როგორც დედაქალაქის მერმა აღნიშნა, ფილტვის კიბოს სკრინინგის უფასოდ ჩატარების შესაძლებლობა ექნებათ, დედაქალაქში, თბილისში რეგისტრაციის მქონე 45-დან 75 წლის ასაკის ჩათვლით თამბაქოს აქტიურ მომხმარებელს, ან იმ მოქალაქეებს, ვინც თამბაქოს მოხმარებას ბოლო 15 წელია თავი დაანებეს.
„თბილისის მერია, ფილტვის კიბოს სკრინინგის დაფინანსებას იწყებს. პროცედურა, 1-ელი მაისიდან მოქალაქეებისთვის სრულად უფასო იქნება. მას დაავადებათა სკრინინგის პროგრამის ფარგლებში, ჯანდაცვისა და სოციალური მომსახურების საქალაქო სამსახური დააფინანსებს. ფილტვის კიბოს სკრინინგის უფასოდ ჩატარების შესაძლებლობა ექნებათ, დედაქალაქში, თბილისში რეგისტრაციის მქონე 45-დან 75 ასაკის ჩათვლით თამბაქოს აქტიურ მომხმარებელს, ან იმ მოქალაქეებს, ვინც თამბაქოს მოხმარებას ბოლო 15 წელია თავი დაანებეს“, – აღნიშნა კალაძემ.
2015 წლის 19 დეკემბერს თბილისში მომხდარმა მკვლელობამ მთელი საქართველო შეძრა. მეუღლისა და 5 წლის შვილის მკვლელობის საქმეზე ახალგაზრდა ქალი – მაგდა პაპიძე დააკავეს. ის ერთადერთი უვადო პატიმარი ქალია საქართველოში. გამოძიებამ დაადგინა, რომ პაპიძემ ქმარს უროთი სასიკვდილო დაზიანებები მიაყენა, ხოლო მცირეწლოვანი გაგუდა.
მაგდა თავს უდანაშაულოდ მიიჩნევს. მიუხედავად ამისა, ის ერთადერთი უვადო ქალი პატიმარია საქართველოში.
ამ ამბავთან დაკავშირებით იურისტმა – მარიამ ჩხეიძემ პირადი მოსაზრება დააფიქსირა და სოციალურ ქსელში პოსტი გამოაქვეყნა.
„მაგდა პაპიძის საქმეზე მინდა დავწერო… საიდან დავიწყო ახლა მაგაზე ვფიქრობ. ნაწილმა იცის ჩემი პოზიცია ამ საქმესთან დაკავშირებით.
ქალთა მიმართ ჩემი სოლიდარობა ყველამ იცით. ეს ყოველთვის ასე იყო. 2015 წლის დეკემბერში ამ საზარელი შემთხვევის შესახებ რომ გავიგე, იყო შოკი. შემდეგ კითხვები! კითხვები! კითხვები!
მისი სასამართლო პროცესი 2016 წელს დაიწყო და იქვე გადავწყვიტე, რომ ყველა პროცესს უნდა დავსწრებოდი… მსგავსი არაფერი მინახავს… ჩემთვის რაღაც ამოუცნობია. პროცესებზე ყოველთვის მკვეთრ მაკიაჟზე არ გავაკეთებ აქცენტს, თუმცა ამან გარკვეულწილად მოახდინა გავლენა ნაფიც მსაჯულებზე.
პროცესზე მისგან ისტერიკას და პანიკას არავინ ითხოვდა, რა თქმა უნდა.
ლოგიკურია, რომ ადამიანს თუ შეუძლია ემოციის გამოხატვა არ დაბადებულ შვილზე, მას შეუძლია ემოციის გამოხატვა დაბადებულ, მისივე გაზრდილ 5 წლის გარდაცვლილ შვილზე. ასეა ხო? მე ასე მიმაჩნია… აქ პირიქით იყო.
მაგდა ტიროდა არდაბადებულ შვილს (როგორც იცით მუცელი მოეშალა. მის მიმართ განხორციელებული ძალადობის ფაქტი არ დადასტურდა) თოკოსთან (გარდაცვლილ შვილთან) კი სხვანაირად იყო. ემოცია 0! განცდა 0! სახე გაყინული, ემოცია გაყინული (ახლოს ვიჯექი და მის ყველა რეაქციას ვაკვირდებოდი).
სხვა ემოცია იყო არდაბადებულ ბავშვზე. ეგრევე ტირილს იწყებდა, სახეზე ემოცია, განცდა… თოკოზე იყინებოდა. საერთოდ არ საუბრობდა თოკოზე, მაშინ როდესაც საუბრობდა შვილზე, რომელიც არ დაიბადა (სამწუხაროა, რომ არ დაბადა, რა თქმა უნდა).
მახსოვს თოკოს ტანსაცმელი რომ შემოიტანეს, რომელიც ბავშვს გარდაცვალებისას ეცვა. მახსოვს მისი ემოცია, რაზედაც არ დავკონკრეტდები, არაა საჭირო, მაგრამ ის სახე, ის ემოცია, დღესაც არ იშლება ჩემი გონებიდან. მახსოვს როგორ უყურებდა (რა თქვა ეგეც მახსოვს და სხვა ქალებისთვის იქნება ეს ცუდი და არ ვაკონკრეტებ). მახსოვს მისი აგრესია ყველას და ყველაფრის მიმართ… ამბობდა, რომ თავად არ მოუკლავს არც ქმარი, არც შვილი. 100%-ით ვარ დარწმუნებული, რომ ორივე მან მოკლა მისი ქმედებებიდან და რეაქციებიდან, ასევე რაც მთავარია, ჩვენებიდან გამომდინარე.
გარდაცვლილი ქმრის და შვილის ფოტოები გამოსაკვლევად რომ მოიტანეს პროცესზე, თავად ამბობდა, რომ არ იცოდა რა დაზიანება ჰქონდათ და აინტერესებდა ეს. შემდეგ როდესაც იწყებოდა გამოკვლევა დატოვა დარბაზი ისე, რომ არც შეუხედავს (აქ გავუგე მგონი… რაღაც ემოციის მაგვარს მივაწერე, თითქოს, რაც ქმრის და შვილის მიმართ გამოხატა პირველად!) ექსპერტიზამ მომკლა მაშინ, პატარა თოკოს ფრჩხილებში ექსპერტიზისას აღმოაჩინეს მაგდას ზედის ბოჭკო…
იმ ზედის, რომელიც მაგდას მკვლელობის დღეს ეცვა.. პატარა თავს იცავდა, პატარა ხელებით ეწინააღმდეგებოდა… დაზიანებები ჰქონდა პატარას გვამს სახეზეც და ყურთანაც (გაგუდვისას დაზიანდა). მაგდამ შეიძულა ქმარი და ქმართან ერთად შვილი, რადგან შვილი იყო საერთო ამ ქმართან…
ფოტოების გამოკვლევა რომ დასრულდა, დაბრუნდა დარბაზში..სახე არც ნაფიცებს ჰქონდათ, არც ჟურნალისტებს და არც დამსწრეებს, ვინც იქ ვისხედით. არც უკითხავს არაფერი, რა სახის დაზიანება იყო, სად ჰქონდა (თ) დაზიანება თუ სხვა.
პროცესიდან გამოვდივარ, ისაა უნდა დავტოვო. მასთან ახლომდებარე სკამზე ვიჯექი. მესმის რაღაც ჩურჩულის მსგავსი დასთან კომუნიკაციას ცდილობდა (გამოვიდა ისე რომ მათ შორის მე ვიდექი მე უფრო კარგად მესმოდა ვიდრე დას). თავიდან სიტყვა “პური” მეგონა… ჩავთვალე მოშივდა რაც ჩვეულებრივი მოვლენაა თან დიდხანს გრძელდება პროცესი. დამ აშკარად ვერ გაიგო. ისაა მე ვაპირებ რომ ვუთხრა პურს ახსენებს-თქო (სხვა ვერ წარმოვიდგინე). “მაგდუ პური? მოგშივდა?” გავუღიმე დას მეთქი სწორია და იმის თქმასაც ვაპირებ, რომ გარეთ გავდივარ და ჩემს ადგილზე თუ დადგება უკეთ დაამყარებს მაგდასთან კომუნიკაციას “პური კი არა პუდრი. 9 ნომერი პუდრი. გუშინ გამითავდა და შემომიტანეთ”. იქვე გავიყინე… დასაც სახე დაეკარგა, აშკარად..მაპატიეთ ამაზე რომ გავაკეთე აქცენტი, მაგრამ უნდა მეთქვა ეს…
საქმის დეტალებს მივუბრუნდები. მოწმეები იხსენებდნენ. ოჯახს საყვარელი ძაღლი ჰყავდა ეზოში… ეს ძაღლი მაგდას აღიზიანებდა. რატომღაც ერთ დღეს თავად გადაწყვიტა მისთვის მიეტანა საკვები. ახსნით თითქოსდა შემოჩვევა უნდოდა… ძეხვი მიუტანა ძაღლს ნემსებით სავსე.. ძაღლმა ჭამა და რა თქმა უნდა მოკვდა… ბევრი რამ მაქვს სათქმელი, მაგრამ ვცდილობ თითქოს თავი შევიკავო…
როგორ დასდევდა მთელი ოჯახი ერთ-ერთ პროკურორს ქალს ორსულს. წყევლა, ლანძღვა გინება… სამივეს დასდევდნენ მაგრამ იმ ერთზე განსაკუთრებით ჰქონდათ აგრესია..”ხელი კარი ერთი, ჩააგორეთ ამ კიბეებიდან! “რა დამავიწყებს ამას! ომარის (მაგდას მეუღლის) დედა გაუბედურებული ქალი, რომელმაც შვილი და შვილიშვილი დაკარგა და მე თავად მოვისმინე როგორ თქვა “ვლოცულობდი, მაგდა არ ყოფილიყო და სხვა ყოფილიყო. რა დღეში ვარ ხვდებით, რაზე ვლოცულობდი?!”
მთავარი… როგორც თავად ამბობდა, შვილი და ქმარი უგონო მდგომარეობაში იპოვა კართან. რომ გამოვიდა ზემოდან დაადგა ქმარს ფეხი. არც დაიყვირა არაფერი. არც შეკივლება. უთხელესი კედლები იყო სახლში. რამე მსგავსი რომ ყოფილიყო ხმას გაიგებდა ყველა. შებრუნდა სახლში (ქმარი და შვილი ჯერ ისევ კართან არიან მისივე ჩვენებით) გამოიტანა ურო ნაყიდი დანაშაულის იარაღი რითაც მოკლა ქმარი და გადააგდო. სასამართლოში ჰკითხეს ქმარი და შვილი უგონო მდგომარეობაში რომ ნახე კართან, რატომ შებრუნდი სახლში, გამოიტანე ურო და გადააგდეო (ჩვენებაში ასე ამბობდა).
ქმარს ცუდი სიმთვრალე ჰქონდა, მეგონა ომარი მთვრალი იყო და რომ გამოფხიზლდება, რამე არ დამიშავოს ამ უროთიო. თან პირველი რეაქცია არა ყვირილი, არამედ ეგ იყო.
რეალურად რა მოხდა? მოკლა ქმარიც და შვილიც. გაყვანა უნდოდა ორივესი მანქანამდე..შემდეგ სადმე დაუსახლებელ ადგილზე დაწვავდა გვამებს და ვერავინ გაიგებდა… ბავშვის ცხედარი ადვილად ჩადო მანქანაში, რა თქმა უნდა. მეუღლის გვამს ვეღარ მოერია, რომელიც სპეცრაზმელი იყო. გამოიწვია ხმაური რაზედაც გამოვიდნენ მეზობლები. ამ გადაადგილებისას და გარკვეული პროცესებისას მოხდა ორსულობის შეწყვეტა. არც ძალადობა დადასტურებულა მის მიმართ. არც მეუღლის მხრიდან არც სამართალდამცავ ორგანოში.
სპეციალურად თავი შევიკავე, მაგრამ ვატყობ რომ მაკრატლის ეპიზოდი საჭიროა. მაგდას დედამთილის და სხვა მოწმეთა ჩვენებით დადასტურდა რომ თოკო ქაფიაშვილს სიცოცხლის ბოლომდე ფეხზე იარა ჰქონდა. რატომ? ბავშვმა იცელქა და დედამ ფეხში მაკრატელი ჩაარტყა. ეს იყო ერთადერთი ეპიზოდი სადაც მეზობლები იხსენებდნენ, რომ მათი სახლიდან ხმამაღალი კამათის ხმა გავიდა. ფაქტს მაგდას მეუღლე ომარ ქაფიაშვილი შეესწრო, რაზედაც ჰქონდა რეაქცია.
სასამართლოს შესვენებაზე მაგდას დედამ და დამ მაგდას ქმრის ომარ ქაფიაშვილის დედა ლილი გაუბედურებული ადამიანი დაიმარტოხელეს საპირფარეშოსთან და სცემეს..სახე აღარ ჰქონდა ქალს! თქვენ არ გინახავთ ძალიან ბევრს, იქ რა ხდებოდა და რა სიტუაცია იყო და ახლაც ძალიან ბევრ რამეზე ვიკავებ თავს, სხვა ქალები რომ არ დავაზიანო. მაგდა პაპიძის დაცვით, სხვა ქალთა უფლებები არ დააზიანოთ ზოგიერთმა. იმ ქალთა უფლებები, ვინც ძალადობის და სისტემის მსხვერპლია. მაგდა პაპიძე არც ძალადობის მსხვერპლია, არც სისტემის“.
primetime.ge
2 მაისიდან 6 მაისამდე საქართველოში მოსალოდნელია დროგამოშვებით ნალექი, ზოგან ძლიერი. შესაძლებელია ელჭექი, სეტყვა, ქარის გაძლიერება, მაღალმთიან რაიონებში ზვავსაშიშროება.
მოსალოდნელმა ნალექებმა შესაძლებელია მდინარეებზე წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო).
რუსეთის საგარეო საქმეთა სამინისტროს ბოლო განცხადება ჟენევის ფორმატის ახალ „ნეიტრალურ” ადგილზე გადატანის თაობაზე მიმდინარე „კონფიდენციალური” მოლაპარაკებების შესახებ უკიდურესად საგანგაშოა. ეს, ფაქტობრივად, ფორმატის დაშლას ნიშნავს და მძიმე დარტყმას აყენებს საქართველოს ტერიტორიულ მთლიანობას,- ამის შესახებ “გახარია საქართველოსთვის“ ლიდერი, გიორგი გახარია სოციალურ ქსელში წერს.
გახარიას თქმით, მისი პარტია ითხოვს საქართველოს საგარეო უწყებისგან განმარტოს, არის თუ არა „ქართული ოცნება“ მოლაპარაკებების მონაწილე.
„ჩვენ მოვითხოვთ საქართველოს საგარეო საქმეთა სამინისტროსგან განმარტებას: არის თუ არა „ქართული ოცნების” მთავრობა ამ საიდუმლო მოლაპარაკებების მონაწილე? როგორია მთავრობის პოზიცია ზახაროვას განცხადებასთან დაკავშირებით?
თვეებია “ქართული ოცნება” მალავს კრიტიკულ ინფორმაციას ინციდენტების პრევენციისა და მათზე რეაგირების მექანიზმის (IPRM) შეხვედრების შესახებ, მაშინ, როდესაც რუსი მაღალჩინოსნები და მათი მარიონეტები კმაყოფილებას გამოთქვამენ მიმდინარე მოლაპარაკებების თაობაზე და იმედებს ჩორჩანასთან დაკავშირებით „ქართული ოცნების” პოზიციის გამო, რაც საფრთხეს უქმნის ჩვენს ეროვნულ ინტერესებს.
ეს სახიფათო ტენდენცია დაიწყო ივანიშვილის ბოდიშით ცხინვალის საოკუპაციო რეჟიმის მიმართ, რასაც მოჰყვა გამოძიება ჩორჩანასთან დაკავშირებით, სადაც 2019 წელს განვათავსეთ პოლიციის საგუშაგო, უკანონო ბორდერიზაციის შესაჩერებლად და საქართველოს მოქალაქეების დასაცავად. ეს „გამოძიება” სრულებით იმეორებს საოკუპაციო რეჟიმის ბრალდებებს, რაც ადასტურებს „ოცნების” თანამშრომლობას საოკუპაციო ძალასთან.
ჟენევის ფორმატი კონფლიქტის მშვიდობიანი მოგვარებისა და დეოკუპაციის ერთადერთი საერთაშორისო მექანიზმია, რომელიც პატივს სცემს საქართველოს ტერიტორიულ მთლიანობას. მისი ჩანაცვლება რუსეთის მიერ განსაზღვრული „ნეიტრალური” ფორმატით საფრთხეს უქმნის ჩვენს ეროვნულ ინტერესებს.
საქართველოს მოქალაქეებმა უნდა იცოდნენ, სად დგას „ოცნება” ამ საკითხში: იცავს თუ არა მთავრობა საქართველოს ტერიტორიულ მთლიანობას, თუ კვლავ საოკუპაციო ძალასთან თანამშრომლობს?”“, – წერს გახარია.
ცნობისთვის, 29 აპრილს რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ განაცხადა, რომ ჟენევის მოლაპარაკებების სხვა ადგილას გადატანის საკითხი რუსულმა მხარემ რამდენიმე წლის წინ წამოჭრა და მას “აფხაზეთის და სამხრეთ ოსეთის წარმომადგენლებმა აქტიურად დაუჭირეს მხარი”. მისი თქმით, ამჟამად, ამ ამოცანის განსახორციელებლად “გულმოდგინე მუშაობა მიმდინარეობს”.
“მხედველობაში მაქვს მოლაპარაკების სივრცის ძიება. მოლაპარაკების პროცესის კონფიდენციალური ხასიათის გათვალისწინებით, ნაადრევი იქნებოდა ამ ეტაპზე, განსაკუთრებით საჯაროდ, კავკასიაში უსაფრთხოებისა და სტაბილურობის შესახებ საერთაშორისო დისკუსიების მომავალი შეხვედრების შესაძლო ადგილმდებარეობის განხილვა, მაგრამ მუშაობა მიმდინარეობს”, – დასძინა ზახაროვამ.
ჟენევის საერთაშორისო მოლაპარაკებები შექმნილია ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების საფუძველზე და მის მთავარ განსახილველ საკითხებს ცეცხლის შეწყვეტის შეთანხმების შესრულება, იძულებით გადაადგილებულ პირთა და ლტოლვილთა საკუთარ სახლში უსაფრთხო და ღირსეული დაბრუნება, რუსეთის ოკუპაციის შედეგად შექმნილი უსაფრთხოებისა და ჰუმანიტარული პრობლემები წარმოადგენს.
მოლაპარაკებები იმართება ევროკავშირის, გაეროსა და ეუთოს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან ცხინვალსა და სოხუმში რუსეთის საოკუპაციო რეჟიმის წარმომადგენლები.
კომბოსტო ერთ-ერთი იმ ბოსტნეულთაგანია, რომელიც გამოირჩევა დაბალი კალორიულობითა და ბევრი სარგებელით, მდიდარია ვიტამინებით C, K და კალიუმი, აქვს ანთების საწინააღმდეგო ეფექტი და ებრძვის კიბოს. თუმცა მიუხედავად ამ ყველაფრისა, ნაკლებად ვაფასებთ და გვიყვარს ის.
ჩვენი წინაპრები საუკუნეების მანძილზე გამოიყენებდნენ კომბოსტოს შეშუპებისა და სილურჯეების დროს, როგორც საუკეთესო ანტისეპტიკი. გლუტამინი, ფიტონციდი, ანტოციანი და ვიტამინები, რომლებიც მის შემადგენლობაშია, ხელს უწყობს კიბოს აცილებას, ასევე მკურნალობს ართრიტს და სპორტულ დაზიანებებს. ამიტომ გთავაზობთ მარტივ პროცედურას, რომლის საშუალებითაც თავიდან აიცილებთ და მარტივად უმკურნალებთ ზემო ჩამოთვლილ შემთხვევებს.
კომპრესისთვის დაგჭირდებათ:კომბოსტო, სახვევი (ბინტი), კილიტა (ფოლგა), თმის სარჭი ან ქინძისთავი, ღუმელი.
როგორ მოვამზადოთ კომბოსტოს ფურცლები კომპრესისთვის: საშუალო ზომის კომბოსტო გარეცხეთ ონკანში გამდინარე წყლის ქვეშ, მოაცალეთ გარეთა რამოდენიმე ფოთოლი, რომელსაც მოაჭრით მკვრივ ადგილებს და კარგად გააშრეთ. გამშრალი ფოთლები შეახვიეთ კალიტაში (ფოლგა) და მხოლოდ 5 წუთით შედგით ღუმელში. დაიმახსოვრეთ, რომ ფოთლები უბრალოდ უნდა გათბეს და არა გაცხელდეს, შეიწვას ან დაიწვას.
ეხლა უკვე მზად არის კომბოსტოს ფურცლები კომპრესისთვის და დაიფინეთ ისინი ფეხზე (ან სხვა მტკივან ადგილზე), გადაიხვიეთ სახვევით (ბინტი) და გაიჩერეთ 1 საათი. კომპრესმა სამკურნალო ეფექტი რომ მოახდინოს, ამისთვის ის უნდა იცვალოთ დღეში 2-3-ჯერ და შედეგს აუცილებლად შეამჩნევთ.
შენიშვნა: თუ დაავადების გამომწვევი მიზეზი ცივ კომპრესს საჭიროებს, მაშინ ანალოგიური მეთოდით იმოქმედეთ, თუმცა ღუმელში გაცხელების მაგივრად, ფურცლები საყინულეში გააჩერეთ 10 წუთით. (სხვა ყველა პროცედურას იგივე მეთოდით ვიმეორებთ)
როგორც წესი, თეთრი კომბოსტოც (ჩვეულებრივი) ეფექტურად მოქმედებს კომპრესის შემთხვევაში, თუმცა უმჯობესია გამოიყენოთ წითელი კომბოსტო (იასამნისფერი). კომპრესის პროცესის დროს თუ შეამჩნევთ ალერგიის მაგვარ სიმპტომებს, მაშინვე შეიხსენით და მიიღეთ ზომები- კერძოდ კი კითხეთ ექიმს ალერგიის საწინააღმდეგო რომელი პრეპარატი მიიღოთ. კომბოსტო არ ხასიათდება ალერგიული რეაქციებით, ამიტომ ეს ძალიან იშვიათ შემთხვევაში ხდება, თუმცა მაინც გვაფრთხილებენ.
ასე, რომ ბუნება გვაძლევს საშუალებას მშვენიერი ბუნებრივი მედიკამენტები ვიქონიოთ და ნუ დავზარდებთ მათ გამოყენებას. წარმატებებსა და ჯანმრთელობას გისურვებთ.
პარლამენტმა მესამე მოსმენით შინაგან საქმეთა სამინისტროს მიერ შემუშავებული საკანონმდებლო ცვლილებათა პაკეტი დაამტკიცა, რომლითაც საგზაო მოძრაობის წესების დარღვევაზე ადმინისტრაციული პასუხისმგებლობა მკაცრდება და არსებული სანქციები იზრდება. „ადმინისტრაციულ სამართალდარღვევათა კოდექსში“ ცვლილებები 84-ხმით, ერთხმად მიიღეს.
საკანონმდებლო ცვლილებებით მთელ რიგ სამართალდარღვევებზე სანქციები იზრდება. კერძოდ:
100 ლარამდე იზრდება ჯარიმა სატრანსპორტო საშუალების გზაზე მანევრირების წესების დარღვევისთვის. ამავდროულად, ამ სამართალდარღვევისთვის მართვის მოწმობისთვის მინიჭებული ქულათა რაოდენობა 20 ქულით შემცირდება.
50-დან 100 ლარამდე იზრდება სანქცია 15 კმ/სთ-ზე მეტი, მაგრამ არაუმეტეს 40 კმ/სთ-ის სიჩქარის გადაჭარბებისთვის.
50 ლარამდე იზრდება სანქცია ავტომობილით მოძრაობისას მძღოლის ან მგზავრის მიერ უსაფრთხოების ღვედის გამოუყენებლობისთვის. აღნიშნული სამართალდარღვევისთვის მართვის მოწმობისთვის მინიჭებული ქულათა რაოდენობა 10 ქულით შემცირდება.
50 ლარამდე იზრდება სანქცია ავტომობილის მართვის დროს მძღოლის მიერ მობილურით სარგებლობისთვის.
დგომა-გაჩერების წესების დარღვევისთვის თბილისის მსგავსად, 50 ლარამდე იზრდება ადმინისტრაციული ჯარიმის ოდენობა ქუთაისში, ბათუმში, მცხეთაში, რუსთავში, გორში, თელავში, ფოთში, ზუგდიდში, ახალციხეში, ოზურგეთსა და საქართველოს კურორტებზე, ასევე M3, N2, N3 ან T კატეგორიის სატრანსპორტო საშუალებებისთვის.
“დრიფტი“, რომელსაც ნივთის ან ადამიანის სხეულის მსუბუქი დაზიანება მოჰყვება, 500-ლარიან ჯარიმასთან ერთად, გამოიწვევს სატრანსპორტო საშუალების მართვის უფლების შეჩერებას – 6 თვის ვადით.
საგზაო მოძრაობის წესების განმეორებით დარღვევა, რომელსაც საავარიო ვითარების ან საცობის შექმნა მოჰყვება, გამოიწვევს დაჯარიმებას 300 ლარის ოდენობით და მართვის მოწმობაზე 30 ქულის შემცირებას.
500 ლარიანი ჯარიმა იქნება გათვალისწინებული თბილისში საერთო სარგებლობის საავტომობილო გზაზე N2 ან/და N3 კატეგორიის სატრანსპორტო საშუალების მოძრაობისთვის იმ შემთხვევაში, თუ სატვირთო გადაზიდვის დანიშნულების ადგილი თბილისი არ არის.
ახალ სამართალდარღვევად განისაზღვრება სატრანსპორტო საშუალების ტროტუარზე ან ქვეითთა გადასასვლელზე დგომა-გაჩერება, რაც თბილისში, ქუთაისში, ბათუმში, მცხეთაში, რუსთავში, გორში, თელავში, ფოთში, ზუგდიდში, ახალციხეში, ოზურგეთში, და საქართველოს კურორტებზე გამოიწვევს დაჯარიმებას 100 ლარის ოდენობით, ხოლო სხვა მუნიციპალიტეტებში – 10 ლარით.
ტროტუარზე სატრანსპორტო საშუალების მოძრაობისთვის დგინდება ჯარიმა 200 ლარის ოდენობით, აგრეთვე დამრღვევს მართვის მოწმობაზე 30 ქულა შეუმცირდება.
“ადმინისტრაციულ სამართალდარღვევათა კოდექსში“ ცვლილებებით ახალი ამკრძალავი ნიშანი − “გაჩერება აკრძალულია სახანძრო ჰიდრანტთან“ შემოდის. აღნიშნული კრძალავს სახანძრო ჰიდრანტთან სატრანსპორტო საშუალების როგორც გაჩერებას, ისე დგომას. დასახელებული მოთხოვნის დაუცველობა გამოიწვევს პირის დაჯარიმებას 200 ლარის ოდენობით, აგრეთვე შესაძლებელი იქნება სატრანსპორტო საშუალების სპეციალურ დაცულ სადგომზე გადაყვანა.
ახლებურად განისაზღვრება “BUS LANE“-ზე სამარშრუტო სატრანსპორტო საშუალების გარდა სხვა სატრანსპორტო საშუალების მოძრაობის საკითხები. კერძოდ, “BUS LANE“-ზე მოძრაობა, არსებულ 100 ლარიან ჯარიმასთან ერთად, დამატებით გამოიწვევს მართვის მოწმობაზე 15 ქულის შემცირებას, ხოლო ქმედების განმეორებისთვის გათვალისწინებულია ჯარიმა 150 ლარის ოდენობით და მართვის მოწმობაზე 30 ქულის შემცირება.
საერთო ნაკადის საპირისპირო მიმართულებით მოწყობილ “BUS LANE“-ზე მოძრაობა, გაჩერება ან დგომა გამოიწვევს დაჯარიმებას 200 ლარის ოდენობით და მართვის მოწმობაზე 20 ქულის შემცირებას, ხოლო ქმედების განმეორებისთვის გათვალისწინებულია ჯარიმა 300 ლარის ოდენობით და მართვის მოწმობაზე 30 ქულის შემცირება.
როგორც შინაგან საქმეთა სამინისტრო განმარტავს, ბოლო წლების განმავლობაში, მნიშვნელოვნად გაზრდილი სატრანსპორტო საშუალებების რაოდენობისა და მზარდი მობილობის ფონზე, საგზაო უსაფრთხოება კვლავ გამოწვევად რჩება. უწყების ინფორმაციით, მიღწეული პროგრესის მიუხედავად, საქართველოში ყოველწლიურად საგზაო-სატრანსპორტო შემთხვევების შედეგად ასობით ადამიანი იღუპება ან ჯანმრთელობის მძიმე დაზიანებას იღებს.
“2025 წლის განმავლობაში საქართველოში ავტოსაგზაო შემთხვევების შედეგად 469 ადამიანი გარდაიცვალა, დაშავდა – 8 191. ავტოსაგზაო შემთხვევები უმეტესად გამოწვეული იყო საპირისპირო ზოლში ავტომობილის გადასვლით, მანევრირების წესის დარღვევით. სიჩქარის გადაჭარბებისთვის მილიონ 700 ათასზე მეტი ადმინისტრაციული ჯარიმა დაიწერა. ავარიების გამომწვევი მიზეზებიდან სიჩქარის გადაჭარბება სიხშირით მე-3 ადგილზე იყო. ეს სტატისტიკაა მოტივაციაა, რამაც აღნიშნული ცვლილებების განხორციელების საჭიროება დააყენა“, – განაცხადა შს მინისტრის მოადგილემ ალექსანდრე დარახველიძემ პარლამენტის პლენარულ სხდომაზე.
ცვლილებები 2026 წლის 1-ელ მაისს ამოქმედდება.
